Partitë politike kanë ndezur motorët e fushatës së zgjedhjeve parlamentare të 25 prillit dhe secila po kërkon strategji për përzgjedhjen e kandidatëve më potencialë. Partia Demokratike, pasditen e kësaj të marte ka marrë vendimin për të nisur votimin për përzgjedhjen e kandidatëve. Sipas demokratëve, kandidatët e mundshëm do të votohen nga anëtarësia. PD bën me dije se votimi do të bëhet çdo ditë në 1 qark dhe do të zgjasë rreth 2 javë. Anëtarët do të kenë mundësi të kontestojnë 1 kandidat ose të konfirmojnë listën në bllok. Kandidatët që shkojnë për votim janë rreth 400, nga 1000 që ishte numri i tyre në fazën e parë të vlerësimit. Ata u përzgjodhën nga Komisioni i Vlerësimit të Kandidatëve, të cilët kanë shqyrtuar, fillimisht, kriteret formale. Pas mbylljes së procesit të votimit nga anëtarësia, Komisioni i Vlerësimit të Kandidatëve do të mblidhet sërish për të vlerësuar kandidatët mbi kriterin e performancës politike dhe maksimalizimin e votës. Vendimi përfundimtar i Komisionit do t’i shkojë për miratim Kryesisë së PD.