Prokuroria e Tiranës, në bashkëpunim me Policinë e Shtetit dhe Postën Shqiptare, ka zbuluar gjatë muajit prill tetë raste të trafikimit të kanabisit nga Shtetet e Bashkuara të Amerikës në Shqipëri, duke goditur këtë fenomen nëpërmjet pakove postare. Kjo veprimtari u identifikua përmes hetimeve proaktive dhe ka prekur pothuajse të gjithë territorin e vendit. Vetëm gjatë muajit të fundit, Prokuroria e Tiranës ka zbuluar raste të trafikut të cannabisit në qytetet Tiranë, Shkodër, Fier, Elbasan dhe Vorë, ndërkohë që hetimet vazhdojnë për të zbuluar raste të tjera. Në total, deri tani janë sekuestruar 15.2 kg cannabis me përqindje të lartë THC, dhe janë arrestuar dhe shpallur në kërkim 12 persona të dyshuar për pjesëmarrje në këtë aktivitet kriminal. Disa nga këta persona janë kapur në flagrancë gjatë dorëzimit të pakove me cannabis në degët e ndryshme të Postës Shqiptare. Hetimet vazhdojnë për identifikimin dhe arrestimin e individëve të tjerë të dyshuar të përfshirë në këtë aktivitet kriminal.