Një makinë që fluturonte me më shumë se 174 kilometra në orë ka rënë në rrjetën e radarëve në rrugën interurbane Fier-Vlorë. Sipas njoftimit zyrtar të policisë, drejtuesi i mjetit u ndëshkua me pezullimin e lejes së drejtimit për 3 muaj si dhe masë administrative prej 20 mijë lekësh të rinj. Gjithashtu policia njofton se është vënë në pranga një 52-vjeçar i cili drejtonte një furgon mallrash, në rrugët e Tiranës, në gjendje të dehur. Ky shtetas përdorte celularin gjatë drejtimit të mjetit si dhe kryente manovra të rrezikshme në rrugë duke rrezikuar jetën e përdoruesve të rrugës. Policia Rrugore e Tiranës e ka bllokuar mjetin në rrugën "Bardhyl" dhe ka prangosur drejtuesin e tij, për të cilin është marrë masa e pezullimit të lejes së drejtimit për 24 muaj, i janë zbritur 8 pikë nga leja e drejtimit, si dhe është ndëshkuar me masë 95.000 lekë të rinj. Në harkun kohor të vetëm 24 orëve janë arrestuar në flagrancë 11 shoferë nga të cilët 4 për drejtim mjeti në gjendje të dehur dhe 7 për drejtim mjeti pa leje drejtimi. Ndërkohë janë pezulluar 43 leje drejtimi, nga të cilat 33 për drejtim mjeti me shpejtësi tej normave të lejuara dhe 10 për drejtim mjeti nën efektin e alkoolit apo në gjendje të dehur. Janë ndëshkuar me masë administrative 2481 drejtues mjetesh, për shkelje të Kodit Rrugor që përbëjnë rrezik potencial për përfshirje në ngjarje rrugore, konkretisht për parakalime të gabuara, shpejtësi mbi normat e lejuara, përdorim të celularit gjatë drejtimit të mjetit, mosrespektim të semaforit, mospërdorim të kaskës mbrojtëse dhe mosvendosje të rripit të sigurimit, si dhe për mosrregullim shpejtësie dhe manovra të rrezikshme në rrugë.