Eksperimenti islandez për javën e punës me katër ditë, ka patur një sukses të jashtëzakonshëm. Kështu shkruajnë kërkuesit që nga 2015-ta deri në 2019-ën, janë marrë me projektin që ka ripërcaktuar raportet Punë-cilësi jetese. Në këto vite, në fakt, të punësuarit e përzgjedhur kanë pësuar një reduktim drastik të orëve të punës, duke mbajtur një pagë të pandryshuar. Islanda, para eksperimentit, pavarësisht se kishte një nga nivelet e të ardhurave më të lartë në evropë, kishte një shkallë produktiviteti shumë të ulët. Sipas punonjësve, në fakt, java e punës me më shumë se 40 orë, që shpesh arrinte edhe në 44 ose më shumë, krijonte pasoja direkte tek produktiviteti dhe tek jeta në familje. Në bazë të një studimi të kryer në 2005, një punëtor në katër ishte i pakënaqur me cilësinë e mangët të jetesës dhe raportin punë-familje. Këshilli komunal i Reykjavikut dhe qeveria kombëtare, angazhuan 2500 punonjës dhe një seri kompanish. Java e punës u reduktua në 35 deri në 36 orë, pa ndryshuar pagën dhe pa pasoja për punëdhënësit. Rezultatet kanë treguar një rënie të nivelit të stresit dhe një ekuilibër më të madh mes punës dhe jetës private.