Sekretari amerikan i Shtetit, Marco Rubio, paralajmëroi Izraelin kundër aneksimit të Bregut të okupuar Perëndimor, duke thënë se hapat e ndërmarrë nga Parlamenti izraelit dhe dhuna e kolonëve po rrezikojnë marrëveshjen e paqes për Rripin e Gazës. Ligjvënësit izraelitë votuan të mërkurën për të çuar përpara dy projektligje që synojnë aneksimin e Bregut Perëndimor, vetëm një javë pasi presidenti amerikan, Donald Trump, ndërmjetësoi një marrëveshje që synon t’i japë fund luftës dyvjeçare izraelite në Rripin e Gazës. “Mendoj se presidenti e ka bërë të qartë se kjo nuk është diçka që mund ta mbështesim për momentin”, tha Rubio. Lëvizjet për aneksim “janë kërcënuese për marrëveshjen e paqes”, shtoi ai. “Ata janë demokraci, ata do të votojnë dhe njerëzit do të marrin qëndrime. Por, në këtë kohë, është diçka që ne mendojmë se mund të jetë kundërproduktive”, tha Rubio. I pyetur për dhunën në rritje të kolonëve ekstremistë izraelitë kundër palestinezëve në Bregun Perëndimor, Rubio u përgjigj: “Jemi të shqetësuar për gjithçka që mund ta destabilizojë atë për të cilën kemi punuar shumë”. Megjithatë, Rubio shprehu optimizëm të përgjithshëm për ruajtjen e marrëveshjes së paqes. “Çdo ditë do të ketë kërcënime ndaj saj, por, në fakt, mendoj se jemi përpara afatit përsa i takon zbatimit të marrëveshjes, dhe fakti që e kaluam këtë fundjavë është një shenjë e mirë”, tha Rubio. SHBA është mbështetësja kryesore ushtarake dhe diplomatike e Izraelit, dhe Rubio deri kohët e fundit ishte përmbajtur nga kritikat ndaj përpjekjeve për aneksim të mbështetura nga aleatët e ekstremit të djathtë të kryeministrit Benjamin Netanyahu.