Pas kritikave ndaj deklaratës së tij që përmbante një formulim të paqartë me problemin e "imazhit të qyteteve" të vendit kancelari gjerman, Friedrich Merz, gjatë një vizite në Londër sqaroi për herë të parë, se çfarë kishte patur parasysh. Ai theksoi nga njëra anë, se Gjermania edhe në të ardhmen do të ketë nevojë për emigracionin kryesisht në tregun e punës. Nga ana tjetër ai për herë të parë shpjegoi, se çfarë e shqetëson atë në imazhin e qyteteve: Emigrantët pa leje qendrimi dhe të papunë, të cilët nuk respektojnë rregullat e vlefshme në Gjermani. Këta pjesërisht karakterizojnë një imazh publik në qytete, tha Merz. Sipas tij imazhe të tilla ka në zona të caktuara si në stacionet e trenit, të metrosë, nëpër parqe, në lagje të tëra, që "edhe policisë u krijojnë probleme". "Ne edhe në të ardhmen kemi nevojë për migracionin. Kjo vlen si për Gjermaninë ashtu edhe për vende të tjera të Bashkimit Europian. Ne kemi nevojë për migrantët kryesisht për tregjet tona të punës, tha kancelari. “Që sot – shtoi ai - emigrantët janë pjesë e domosdoshme e tregut tonë të punës. Ne nuk mund të heqim dorë prej tyre, pavarësisht se nga vijnë, çfarë ngjyre lëkure kanë, ose nëse jetojnë e punojnë në Gjermani në brezin e parë, të dytë apo të tretë", tha ai. Merz gjatë ditëve të fundit është kritikuar shumë në Gjermani lidhur me deklaratën e tij për temën e migracionit: "Në imazhin e qytetit ende është ky problem", tha ai. I pyetur, se çfarë kishte parasysh me këtë, gjatë një konference për shtyp, ditë më pas, Merz u përgjigj: "Pyesni njëherë vajzat tuaja". Kundër kësaj deklarate mbi 120.000 vetë brenda vetëm 24 orësh nënshkruan një peticion të titulluar "Ne jemi vajzat”.