Kina kritikoi të hënën vendimin e Japonisë për të vendosur raketa në një ishull pranë Tajvanit, duke përshkallëzuar një përplasje diplomatike disajavore. Media japoneze citoi të dielën ministrin e mbrojtjes të Japonisë, Shinjiro Koizumi, të ketë thënë se vendosja e planifikuar e raketave në ishullin Yonaguni, i cili është afër Tajvanit, ishte në rrugën e duhur. "Vendosja e tyre mund të zvogëlojë mundësinë e një sulmi të armatosur ndaj Japonisë", tha Koizumi. Marrëdhëniet Pekin-Tokio janë përkeqësuar këtë muaj, pas deklaratave të kryeministres japoneze Sanae Takaichi që sugjeruan se Tokio mund të ndërhyjë ushtarakisht në çdo sulm ndaj Tajvanit. Ministria e jashtme e Kinës tha të hënën se vendosja e raketave të Japonisë ishte një "përpjekje e qëllimshme për të krijuar tension rajonal dhe për të provokuar konfrontim ushtarak". "Së bashku me deklaratat e gabuara të kryeministres Sanae Takaichi mbi Tajvanin, ky trend është jashtëzakonisht i rrezikshëm dhe meriton vigjilencë të lartë nga vendet fqinje dhe bashkësia ndërkombëtare", u tha gazetarëve zëdhënësja e ministrisë së jashtme kineze.