Zhytësit rifilluan të mërkurën kërkimet për të mbijetuar pasi jahti i sipërmarrësit të teknologjisë britanike Mike Lynch u mbyt në brigjet e Siçilisë mes një stuhie intensive dy ditë më parë, megjithëse shpresat janë zvogëluar për të gjetur të gjallë gjashtë personat që mungojnë në apel. Bayesian me flamur britanik, një superjaht 56 metra i gjatë, mbante 22 pasagjerë dhe ekuipazh dhe ishte ankoruar në portin e Porticellos, afër Palermos, kur u përmbys gjatë një stuhie të egër para agimit të hënën. Pesëmbëdhjetë persona mbijetuan, trupi i një personi të pajetë u gjet shpejt pas incidentit ndërsa gjashtë të tjerë mbeten ende të zhdukur, duke përfshirë Lynch, vajzën e tij 18-vjeçare dhe Jonathan Bloomer, një shef jo-ekzekutiv i Morgan Stanley International. Me jahtin e fundosur në një thellësi prej rreth 50 metrash, përpjekjet për të gjetur të mbijetuarit ose trupat kanë qenë të vështira. Zyrtarët e brigadës së zjarrfikësve thonë se zhytësit kanë vetëm 8-10 minuta kohë për të kërkuar në anijen e mbytur, përpara se të dalin në sipërfaqe. Përpjekjet e tyre janë penguar nga hapësirat "shumë të kufizuara", tha zëdhënësi i departamentit të zjarrfikësve. Ekspertët nuk kanë mundur të shpjegojnë se si një anije e madhe luksoze, që supozohet se kishte pajisje të klasit të lartë dhe karakteristika sigurie, mund të fundosej brenda disa casteve, siç tregojnë dëshmitarët. Një tjetër jaht i ankoruar pranë tij mbeti i padëmtuar nga stuhia. Ndërkohë janë publikuar edhe pamjet e kamerave të sigurisë të një ambjenti në breg, që tregojnë momentet e mbytjes së jahtit. Pamjet tregojnë se gjithcka ka ndodhur shumë shpejt ndërsa dëshmitarët flasin për vetëm 60 sekonda..