Njëmbëdhjetë anëtarë të një familjeje humbën jetën pasi Izraeli goditi një automjet në Gaza, duke e akuzuar atë për kalimin e “vijës së verdhë”, një kufi që ndan zonat nën kontrollin ushtarak izraelit. Hamasi e cilësoi ngjarjen si një “masakër” dhe deklaroi se familja u sulmua pa asnjë justifikim. Grupi i bëri thirrje Presidentit të SHBA-së, Donald Trump dhe ndërmjetësve të tjerë ndërkombëtarë që të ushtrojnë presion ndaj Izraelit për të respektuar marrëveshjen e armëpushimit. Nga ana tjetër, udhëheqësi i Hamasit Mohammed Nazzal, në një intervistë për Reuters, deklaroi se Hamasi synon të ruajë kontrollin e sigurisë në Gaza përkohësisht. Hamasi ka dorëzuar deri tani trupat e nëntë pengjeve izraelitë të vrarë, dhe së fundmi i ka dorëzuar edhe trupin e një tjetër pengu. “Hamasi duhet të respektojë marrëveshjet dhe të kthejë eshtrat e të gjithë pengjeve izraelite të mbetura të vrarë dhe që mbahen ende në Gaza”, thuhet në deklaratën e zyrës së Netanyahut pas dorëzimit të trupit të pengut. Aktualisht, në Gaza ndodhen ende trupat e 18 pengjeve të vdekur izraelitë. Ndërkohë, situata humanitare mbetet kritike. Kalimi i Rafah pritet të rihapet të dielën, por vetëm për njerëzit jo për furnizimet humanitare me kamionë.