Izraeli tha të hënën se Hamasi ende nuk kishte sqaruar nëse 34 pengjet që thoshte se ishte gati t'i lironte ishin të vdekur apo të gjallë, duke hedhur dyshime mbi pohimin e grupit se i duhej kohë për të përcaktuar fatin e tyre. Oferta nga Hamasi erdhi pasi Izraeli vazhdoi të sulmonte Rripin e Gazës, ku ekipet e shwptiumit thanë se 16 njerëz u vranë të hënën. Në Bregun Perëndimor të pushtuar, ku dhuna është rritur që nga shpërthimi i luftës në Gaza, zyrtarët izraelitë thanë se tre qytetarë izraelitë u vranë nga persona të armatosur qw hapën zjarr mbi një autobus dhe automjete të tjera. Ndërmjetësuesit nga Katari, Egjipti dhe Shtetet e Bashkuara kanë punuar prej muajsh për të arritur një marrëveshje për t'i dhënë fund luftimeve në Gaza, por të dyja palët kanë akuzuar tjetrën për prishjen e negociatave. Bisedimet indirekte që rifilluan muajin e kaluar vazhduan edhe gjatë fundjavës. Një zyrtar i lartë i Hamasit tha të dielën vonë se grupi ishte i përgatitur të lironte një grup fillestar të robërve, por do t'i duhej "një javë qetësie" për të përcaktuar nëse ata ishin ende gjallë. Por zëdhënësi i qeverisë izraelite, David Mencer, e hodhi poshtë këtë pohim të hënën. "Ata e dinë saktësisht se kush është i gjallë dhe kush është i vdekur. Ata e dinë saktësisht se ku janë pengjet," u tha ai gazetarëve.