Izraeli mori të premten mbetjet e një pengu tjetër nga Gaza, tha zyra e kryeministrit, ndërsa grupi militant i Hamas po vijonte gërmimet me buldoezer për të gjetur të tjera trupa nën rrënojat e enklavës së shkatërruar nga lufta. Forcat ushtarake dhe të sigurisë izraelite morën arkivolin nga Komiteti Ndërkombëtar i Kryqit të Kuq brenda Rripit të Gazës dhe e dërguan më pas në Qendrën Kombëtare për Mjekësi Ligjore të Ministrisë së Shëndetësisë në Izrael. Autoritetet izraelite thanë se familja e të ndjerit do të njoftohet e para pas një procesi zyrtar identifikimi. Dorëzimi erdhi pasi krahu ushtarak i Hamasit, i njohur si Brigadat Qassam, tha se eshtrat ishin të një "të burgosuri pushtues", duke sugjeruar se ato i përkisnin një izraeliti dhe jo njërit prej pengjeve të disa kombësive të tjera të marra gjithashtu në Gaza. Dorëzimi i pengjeve, i kërkuar sipas marrëveshjes së armëpushimit, ka qenë ndër pikat kryesore të mosmarrëveshjes - së bashku me shpërndarjen e ndihmave, hapjen e kalimeve kufitare në Gaza dhe shpresat për rindërtim - në një proces të mbështetur nga pjesa më e madhe e bashkësisë ndërkombëtare për të ndihmuar në përfundimin e dy viteve të luftës shkatërruese në Gaza.