Izraeli tha se ka goditur qindra shënjestra në Liban, disa orë pasi udhëheqësi i Hezbollahut mbajti një fjalim ku u zotua për hakmarrje, pas një sërë shpërthimesh të regjistruara në Liban dhe Siri, që kishin në shënjestër pajisjet e komunikimit të grupit. Izraeli nuk ka komentuar shpërthimin e mijëra pejxherëve dhe radiove të Hezbollahut, që kanë lënë të vrarë 37 persona dhe kanë plagosur pothuajse 3.000 të tjerë më herët gjatë kësaj jave, por Izraeli është fajësuar nga Hezbollahu për këto sulme. Në fjalimin e tij, lideri i Hezbollahut, Hassan Nasrallah, synoi të arrite dy qëllime kryesore: forcimin e moralit të Hezbollahut dhe mbajtjen e presionit psikologjik ndaj Izraelit. Pavarësisht se e pranoi se shpërthimet e pajisjeve të komunikimit të grupit përbënin një kthim prapa, ai i paraqiti incidentet vdekjeprurëse si pengesë të përkohshme në konfliktin më të gjerë me armikun.