Hamasi ka thënë se një armëpushim i përkohshëm mund të arrihet brenda këtyre 24 ose 48 orëve pasuese nëse izraeli do të plotësojë kërkesat e tij. Marrëveshja e propozuar e armëpushimit, që mësohet se do të zgjasë për gjashtë javë, mund të sjellë një pauzë në luftime si edhe lirimin e pengjeve gjatë muajit të shenjtë të ramazanit. Zëvendës shefi i hamasit në Gaza, Khalil al Hayyas, ka mbërritur në Kajro për të marrë pjesë në bisedimet për armëpushim, që kanë nisur një ditë më parë në doha të katarit. Një zyrtar i lartë amerikan ka thënë se rruga për të arritur tek armëpushimi është hapur pasi të dyja palët janë përgatitur për të rinisur bisedimet. “Rruga për një armëpushim tani është e hapur. Dhe ka edhe një marrëveshje në tryezë. Ka një marrëveshje kornizë. Izraeli pak a shumë e ka pranuar atë. Tani topi është në duart e Hamasit”. E gjithë kjo ndodh pasi grupi terrorist mori një propozim nga bisedimet për paqen që u mbajtën në paris, tha një burim i afërt me diskutimet të martën. Negociatorët nga SHBA, Egjipti dhe Katari kanë hartuar propozime që përfshijnë lirimin e pengjeve nga hamasi në këmbim të lirimit të të burgosurve palestinezë dhe një armëpushimi gjashtë javor. Izraeli thuhet se e ka pranuar paraprakisht marrëveshjen që do të nisë me lirimin e pengjeve të lënduara, të moshuara e femra. Mësohet edhe se Hamasi e ka studiuar propozimin javën e kaluar dhe mund të arrijë një marrëveshje me izraelin gjatë ditës. Por marrëveshja mund edhe të rrëzohet pasi hamasi nuk i ka publikuar ende kërkesat e tij.