Nga e hëna, Italia mbyll klubet e natës dhe e bën të detyrueshme mbajtjen e maskave gjatë natës në disa zona të vendeve të hapura. Ky është rikthimi i parë e kufizimeve, pas rritjes së rasteve të koronavirusit në gjithë vendin, veçanërisht mes të rinjve. Fotografitë e turmave të pushuesve të rinj që vallëzojnë dhe pinë natën, ishin në faqet e para të gazetave italiane. Rastet e reja gjatë javës së kaluar në Itali, vendi i parë evropian që u godit rëndë nga koronavirusi, ishin më shumë se dyfish nga ato të regjistruara tre javë më parë dhe mosha mesatare e personave që u infektuan ka rënë nën 40, sipas të dhënave. Rregullat e reja që nisin të hënën do të zgjasin deri në fillim të shtatorit. Mbajtja e maskës kërkohet nga ora 18:00 deri në 06:00 në zonat afër bareve ku ka më së shumti grumbullime njerëzish.