Shtatë shtetasit maqedonas që gjendeshin në një hotel afër Manastirit në Banjskë, ku ndodhi sulmi ndaj pjesëtarëve të Policisë së Kosovës, të shoqëruar nga policia, u kthyen të hënën në Maqedoninë e Veriut. Njoftimi është bërë nga ministri i Punëve të Jashtme, Bujar Osmani, sipas të cilit shtetasit maqedonas janë lënë të lirë pas marrjes në pyetje dhe analizave të tjera nga Policia e Kosovës. “Pas marrjes në pyetje dhe analizave të zakonshme nga Policia e Republikës së Kosovës, sot në mëngjes qytetarët tanë janë nisur të sigurt për në shtëpi, të shoqëruar nga Policia e Kosovës. Rrethanat, në të cilat u gjendën, ishin komplekse, duke qenë se ata ishin të vendosur në një hotel, në afërsi të vendit ku ndodhi sulmi me armë ndaj policisë”, ka njoftuar Osmani në rrjetin social Facebook. Osmani tha se lidhur me këtë rast ishte në kontakt të vazhdueshëm me autoritetet e Kosovës, të cilat “garantuan sigurinë e qytetarëve maqedonas”. Ai nuk dha detaje të tjera mbi qëndrimin e shtetasve të Maqedonisë së Veriut në afërsi të Manastirit të Banjskës.