Raketa iraniane goditën Tel Avivin e Izraelit dhe qytetin portual të Haifës para agimit të së hënës, duke vrarë të paktën tetë persona dhe duke shkatërruar shtëpi, cka bëri që ministri i mbrojtjes i Izraelit të paralajmërojë se banorët e Teheranit do të "paguajnë çmimin shumë shpejt". Viktimat e fundit në Izrael, të raportuara nga shërbimet kombëtare të emergjencës së Izraelit, e çuan numrin e të vdekurve në 23 që nga e premtja. Sulmet izraelite në Iran kanë vrarë ndërkohë të paktën 224 persona që nga e premtja, tha ministria e shëndetësisë e Iranit. Të paktën 100 të tjerë u plagosën në Izrael në sulmin e natës, pjesë e një vale sulmesh nga Teherani në hakmarrje për sulmet e Izraelit që synonin programet e raketave bërthamore dhe balistike të armikut të betuar, Iranit. Operacionet e kërkim-shpëtimit nisën në Haifa, ku rreth 30 persona u plagosën, thanë autoritetet e emergjencës, ndërsa dhjetëra ekipe të ndihmës së parë nxituan drejt zonave të sulmit. Zjarre u panë në një termocentral pranë portit, raportuan mediat.