OSBE ODIHR vlerëson se zgjedhjet e 11 majit janë një test i rëndësishëm i zhvillimit të institucioneve demokratike të Shqipërisë, veçanërisht në kuadrin e bisedimeve për anëtarësimin në Bashkimin Evropian. Raporti paraprak i vëzhuesve të OSBE ODIHR që përfshin periudhën nga 1 deri në 21 prill konstaton se sulmet personale midis liderëve të partive kryesore janë të zakonshme, përfshirë dhe ato online, duke shtuar se mjedisi politik para zgjedhjeve të 11 majit paraqet një nivel të lartë polarizimi. “Keqpërdorimi i burimeve shtetërore dhe fushata brenda institucioneve publike është e ndaluar, por shqetësimet vazhdojnë për presion ndaj nëpunësve civilë, ndikim të padrejtë mbi votuesit dhe keqpërdorim të aseteve publike. KQZ ka marrë ankesa të shumta lidhur me shkeljet e fushatës dhe vazhdon të monitorojë.” – thuhet në raport duke shtuar se fushata në rrjetet sociale është ende e parregulluar ligjërisht.