Presidentja e Komisionit Evropian, Ursula von der Leyen zhvillon këtë të enjte një drekë pune me udhëheqësit e Ballkanit Perëndimor. Zëdhënësja e Komisionit, Ana Pisonero ka konfirmuar se ftesa i ka shkuar kryeministrit të Shqipërisë, Edi Rama, kryeministrit të Kosovës, Albin Kurti, kryeministrit të Maqedonisë së Veriut, Hristijan Mickoski, kryeministrit të Malit të Zi. Milojke Spajiç, kryetares së Këshillit të Ministrave të Bosnjë-Hercegovinës, Borjana Kristo dhe Presidentit të Serbisë, Aleksandar Vuçiç. Pisonero nuk ka treguar nëse do të jenë të pranishëm të gjithë drejtuesit. Von der Leyen ka ftuar liderët ballkanikë të konfirmojnë vazhdimin e bashkëpunimit mes vendeve të Ballkanit Perëndimor dhe BE-së në kuadër të qasjes së rajonit ndaj bllokut. Fokusi në këtë drekë pune është në axhendat e reformave që gjashtë vendet e Ballkanit i kanë dorëzuar Brukselit, si dhe në Planin e Rritjes.