Një javë pasi Mirlinda Karçanaj dorëzoi dorëheqjen nga drejtimi i AKSHI-t, kryeministri Edi Rama prezantoi pasuesin e saj, Igli Tafën. Pavarësisht hetimeve të SPAK për abuzime me tenderat, Rama u shfaq i sigurt se nga kjo betejë gjyqësore Karçanaj do të dalë e pastër, duke shtuar se ndihet i keqardhur për situatën ku ndodhet ish drejtoresha e Autoritetit Kombëtar të Shoqërisë së Informacionit. Rama: “Jam pikëlluar nga gjithçka që ajo po kalon. Në radhë të parë nga agresioni barabar i portaleve, dhunës verbale që e asociojnë me gjëra të cilat nuk kanë asnjë lidhje me të. Por unë kam dijeni për faktin që Linda është nënë e vetme me dy fëmijë. Ka një karrierë nga më të shkëlqyerat në shërbimin publik. Kam dijeni që me të gjithë partnerët, edhe ju e dini më mirë se unë që AKSHI ka partnerë të nivelit të lartë, Microsoft-i, Oracle, unë kam dëgjuar fjalët më entuziaste dhe mbresat më të jashtëzakonshme për ju, për stafin tuaj dhe për Linda Karçanajn. I them këto në respekt të një personi që sot ndodhet në një kalvar, ku unë besoj me gjithë zemër do dalë i pastër, por nuk më takon mua ta them këtë, i takon drejtësisë.”