Media shtetërore e Koresë së Veriut tha të mërkurën rreth 1.4 milionë të rinj kishin aplikuar për t'u bashkuar ose për t'u kthyer në ushtri këtë javë, duke fajësuar Seulin për një inkursion provokues me dron që e ka sjellë "situatën e tensionuar në prag të luftës". Retorika e zjarrtë vjen pasi Koreja e Veriut javën e kaluar akuzoi Seulin për dërgimin e dronëve që shpërndanë një "numër të madh" fletëpalosjesh kundër Veriut, mbi Phenian. Më pas vendi i izoluar hodhi në erë rrugët ndër-kufitare dhe linjat hekurudhore në anën e saj të kufirit dhe paralajmëroi se Jugu do të "paguante një çmim të shtrenjtë". Të rinjtë, duke përfshirë studentë dhe zyrtarë të ligës rinore që kanë firmosur peticionet për t'u bashkuar me ushtrinë, janë të vendosur të luftojnë në një "luftë të shenjtë të shkatërrimit të armikut me krahët e revolucionit", tha agjencia zyrtare e lajmeve KCNA. Fotografitë e publikuara nga KCNA treguan ata që agjencia tha se ishin të rinj që nënshkruanin peticione në një vend të panjohur. "Nëse shpërthen një luftë, Koreja e jugut do të fshihet nga harta. Meqenëse ajo dëshiron një luftë, ne jemi të gatshëm t'i japim fund ekzistencës së saj," thuhet në raportin e KCNA. Koreja e Veriut ka bërë edhe më herët pretendime të ngjashme për të rinjtë që duan të regjistrohen në ushtri në një kohë tensionesh të shtuara, megjithëse deklarata të tilla nga shteti i izoluar janë të vështira për t'u verifikuar. Vitin e kaluar, media shtetërore raportoi për 800,000 qytetarë që kishin kërkuar në mënyrë vullnetare për t'u bashkuar me ushtrinë për të luftuar kundër Shteteve të Bashkuara. Sipas të dhënave, Koreja e Veriut ka 1.28 milionë ushtarë aktivë dhe rreth 600,000 rezervistë, me 5.7 milionë rezervistë të Gardës së Kuqe të Punëtorëve dhe Fshatarëve në mesin e shumë njësive të paarmatosura.