Dy raste të rënda, njëri për tentativë vrasjeje dhe tjetri për kanosje me armë zjarri dhe dhunë fizike, janë regjistruar në Shkodër. Për ngjarjet, Policia ka identifikuar dhe shpallur në kërkim tre persona. Në rastin e parë, një 25-vjeçar, i identifikuar si Klaus Fermosi, dyshohet se më 11 tetor ka hyrë në një fushë sportive në Shkodër dhe i ka drejtuar armën një 27-vjeçari, me qëllim vrasjen e tij. Ndërsa në rastin tjetër, dy persona, Florild Gjelaj, 40 vjeç, dhe Fadjol Saraçi, 37 vjeç, dyshohet se kanë kanosur me armë zjarri dhe kanë goditur me grushte një 38-vjeçar në një lokal në Shkodër. Ngjarja ka ndodhur më 12 tetor, ndërsa i dëmtuari ka pësuar dëmtime në fytyrë. Për të dyja ngjarjet, policia po vijon punën për kapjen e tre personave të shpallur në kërkim. Ndërkohë, materialet procedurale i janë referuar Prokurorisë për veprime të mëtejshme.