Bizneset rritën peshën e borxhit gjatë gjashtëmujorit të parë të këtij viti. Anketa e Bankës së Shqipërisë me 1355 ndërmarrje tregon se rritja më e madhe e huave është vënë re te bizneset e vogla dhe të mesme, ndërsa ka rënie te bizneset e mëdha, Pjesa dërrmuese e borxhit të shënuar në gjashtë muajt e parë të këtij viti ka pasur si burim bankat e nivelit të dytë, me një shifër mbi 90 për qind, ndërsa pjesa tjetër ka burime alternative financimi, përfshirë këtu borxhet me persona fizikë, apo mall i papaguar. Anketa e Bankës së Shqipërisë tregon se gati gjysma e borxhit të ri të dhënë në gjysmën e parë të këtij viti është marrë nga ndërtuesit, tregtia dhe më pas shërbimet. 19 për qind e bizneseve të anketuara deklarojnë se kanë nivelin e borxhit sa kapitali, ose më të lartë se kapitali i tyre. E njëjta kategori deklaron se hasin vështirësi gjatë kërkesave për financim të bankat e nivelit të dytë, që referuar bilanceve të tyre shtrëngojnë kriteret për këto biznese. Banka e Shqipërisë thotë se borxhet e reja janë përdorur nga bizneset kryesisht për mbulimin e shpenzimeve afatshkurtra dhe më pas për investime.