2 gushti shënon mbylljen e fushatës së Vangjel Tavos dhe Petraq Gjikurisë për bashkinë e Himarës. Të dielën më shumë se 23 mijë zgjedhës kanë të drejtë t’i drejtohen kutive të votimit, për të përcaktuar nëse peshorja do të anojë majtas apo djathtas në këtë garë elektorale. Numri i qytetarëve me të drejtë vote është rritur nëse e krahasojmë me vitin 2023, ku në zgjedhjet e 14 majit zgjedhës me të drejtë vote ishin 22 mijë e 822. Nga këta vetëm 34.27 për qind votuan dhe rezultati elektoral ishte shumë i ngushtë mes kandidatëve Fredi Beleri dhe Jorgo Goro. Kandidati i Partisë Socialiste fitoi 3821 vota ndërsa ai i koalicionit ‘Bashkë Fitojmë’, Fredi Beleri kryesoi me 3840 vota, duke shënuar herën e parë në historinë e vendit që një kandidat fiton nga qelitë e burgut, ku u vendos 48 orë para garës elektorale për shit-blerje votash.