Grupi Hezbollah i Libanit mori përgjegjësinë për lëshimin e mbi 200 raketave mbi baza të shumta ushtarake izraelite në përgjigje të një sulmi ajror që vrau një komandant të lartë të tij. Ushtria izraelite tha se "predha të shumta" kishin hyrë në territorin izraelit nga Libani, shumë prej të cilave ishin rrëzuar. Nuk pati raportime të menjëhershme për viktima. Ushtria e Izraelit pranoi të mërkurën se kishte vrarë Mohammad Naameh Nasser, i cili drejtonte një nga tre divizionet rajonale të Hezbollahut në Libanin jugor, një ditë më parë. Disa orë më vonë, Hezbollahu lëshoi një numër të madh raketash Katyusha dhe Falaq, me koka të rënda luftarake, mbi pjesën veriore të izraelit dhe në lartësitë e pushtuara siriane të Golanit. Hezbollahu lëshoi akoma më shumë raketa të enjten dhe tha se kishte nisur po ashtu edhe dronë kamikazë mbi disa baza. Sulmi shënon një nga përshkallëzimin më të madh në konfliktin e vazhdueshëm përgjatë kufirit Liban-Izrael mes tensioneve të rritura javët e fundit. Mes frikës së përshkallëzimit rajonal, SHBA dhe Franca po punojnë në mënyrë aktive për të parandaluar që situata të përshkallëzohet më tej në një luftë të gjerë. Zyrtarët izraelitë, ndërkohë, thonë se mund të vendosin të hyjnë në luftë edhe në Liban nëse përpjekjet për një zgjidhje diplomatike dështojnë. Izraeli e sheh Hezbollahun si kërcënimin e tij më të drejtpërdrejtë dhe vlerëson se grupi ka një arsenal prej 150,000 raketash. Në vitin 2006, Izraeli dhe Hezbollahu u përballën në një luftë një mujore nga e cila nuk pati asnjë fitimtar.