Nisur nga shqetësimi i opinionit publik shqiptar për nivelin e korrupsionit në administratën publike, në vendin tonë, si dhe prioritetet e institucioneve shqiptare dhe kërkesat e vazhdueshme të organizmave të ndryshme ndërkombëtare dhe partnerëve strategjikë të Shqipërisë për forcimin e luftës kundër fenomenit të korrupsionit, Kontrolli i Lartë i Shtetit dhe SPAK nënshkruam një marrëveshje bashkëpunimi. Kryetari i KLSH, Arben Shehu dhe drejtuesi i SPAK Arben Kraja ranë dakord për realizimin e bashkëpunimit të ndërsjelltë për shkëmbim të informacioneve me qëllim evidentimin e saktë të shkeljeve që përmbajnë elementë të veprave penale të cilat janë në kompetencën lëndore të Prokurorisë së Posaçme. Kreu i KLSH, shprehu vullnetin institucional për zhvillimin e auditimeve të thelluara dhe profesionale si dhe përcjelljen e informacioneve të nevojshme në çdo fazë të procesit të auditimit, në lidhje me sektorë të cilët rezultojnë me risk të lartë të nivelit të korrupsionit duke ofruar dhe asistencën e nevojshme në lidhje me ligjshmërinë e procedurave. Nga ana tjetër, Drejtuesi i SPAK shprehu vullnetin për trajtimin me prioritet të materialeve kallëzuese të referuara nga Kontrolli i Lartë i Shtetit si dhe për zhvillimin e takimeve të përbashkëta në kuadër të ndërveprimit institucional në luftën kundër korrupsionit