Një plan pandemik i vjetruar mund të ketë kontribuar në mijëra viktima të Covid 19 në Itali, sipas një raporti që do ti prezantohet prokurorëve që po hetojnë gabimet e supozuara të autoriteteve italiane. Italia kishte një plan të vjetër dhe të papërshtatshëm sipas raportit me 65 faqe të hartuar nga gjenerali në pension Pier Paolo Lunelli dhe që është parë nga Guardian. Lunelli vlerëson se deri në 10 mijë nga mbi 35 mijë viktimat në Itali mund ti atribuohen mungesës së protokolleve të përshtatshme anti pandemi. Autoritetet italiane nuk kanë përditësuar planin pandemik të vendit në 2017, kur organizata botërore e shëndetësisë dhe qendra evropiane për kontrollin dhe parandalimin e sëmundjeve prezantuan udhëzime të reja. Një plan pandemik për gripin, i botuar në faqen e internetit të ministrisë italiane të shëndetësisë tregon se është apdejtuar për herë të fundit më 15 dhjetor 2016 e madje mund të ishte krijuar që në janar 2006. Në raportin e tij, Lunelli ka krahasuar planin e Italisë me atë të vendeve të tjera evropiane.