Drejtori i Përgjithshëm i Policisë së Shtetit, Ilir Proda shpalli zyrtarisht thirrjen për paraqitjen e shprehjes së interesit për pozicionet e 12 drejtuesve të qarqeve. Kandidatët që do të aplikojnë duhet të dorëzojnë deri më 29 tetor në Komisionin e Posaçëm të vlerësimit të kandidatëve të ngritur pranë Drejtorisë së Përgjithshme e Policisë një kërkesë me shkrim, ku shprehin interesin për të aplikuar. Kandidatët duhet të mbajnë gradën drejtues, ose drejtues i parë, të kenë shtetësi shqiptare dhe të mos kenë qenë të dënuar për kryerjen e një vepre penale me vendim gjyqësor të formës së prerë. Pas përfundimit të afatit 7-ditor për paraqitjen e aplikimeve, Komisioni i vlerësimit të kandidatëve publikon në faqen zyrtare të Drejtorisë së Përgjithshme të Policisë së Shtetit emrat e aplikantëve. Brenda afatit 10 ditor nga momenti i mbylljes së fazës së aplikimeve, Komisioni kryen vlerësimin paraprak të aplikimeve, me qëllim verifikimin e plotësimit të kushteve ligjore. Në përfundim të vlerësimit paraprak, Komisioni harton listën e kandidatëve që plotësojnë kushtet ligjore dhe të kandidatëve që nuk i plotësojnë këto kushte, bazuar në dokumentacionin e paraqitur nga kandidati dhe dokumentacionin shtesë të mbledhur nga Komisioni.