Hakerat kanë vënë në shënjestër qindra frigoriferë supermarketesh në mbarë Francën, duke bërë që ushqimet që kërkojnë temperatura të ulëta të prishen. Produkte të freskëta, mishi, bulmeti dhe ushqime të tjera të ngrira, me vlerë miliona euro përfunduan të prishura pasi një sulm kibernetik bëri që temperaturat e frigoriferëve dhe ngrirësve të arrinin deri në 50°C gjatë natës. Sulmi komprometoi softuerin e kontrollit të zinxhirit të ftohjes në dyqanet mbarëkombëtare të rrjeteve Intermarché, E.Leclerc dhe Coopérative U. Drejtori ekzekutiv i kësaj të fundit deklaroi se disa nga supermarketet e tij ishin goditur nga ky sulm "jashtëzakonisht serioz dhe i paprecedentë". Nga sulmi u prekën gjithashtu shitës të tjerë të mëdhenj ushqimorë, përfshirë Carrefour dhe Monoprix. Raportohet se hakerët riprogramuan nga distanca rregullatorët e ftohjes për të detyruar një cikël të vazhdueshëm shkrirjeje, duke rritur temperaturat e brendshme deri në 50°C. Ndërsa shtrirja e plotë e sulmit mbetet ende e paqartë, besohet se në total u prekën rreth 500 dyqane në Francë, sipas BBC-së. Autoritetet franceze të zbatimit të ligjit dhe agjencia kombëtare e sigurisë kibernetike kanë nisur një hetim për të identifikuar autorët e sulmit. Komisioneri Evropian për Bujqësinë dhe Ushqimin, Christophe Hansen, e dënoi ashpër sulmin kibernetik në një postim në platformën X, duke deklaruar: "Siguria ushqimore kërkon më shumë vëmendje në të gjitha nivelet. Sepse shndërrimi i ushqimit në armë është bërë realitet". Ky incident ndodh në një kohë kur shtohen shqetësimet për dëmet e mëdha që mund t'u shkaktohen të gjithë sektorëve në Evropë nga sulmet kibernetike të kryera prej aktorëve keqdashës.