Suedia dhe Finlanda kanë përditësuar udhëzimet për qytetarët e tyre se si t'i mbijetojnë luftës, ndërsa aleatët e NATO-s po rrisin masat e mbrojtjes në sfondin e konfliktit në Ukrainë. Të dy vendet iu bashkuan aleancës transatlantike në dy vitet e fundit, pasi Rusia pushtoi fqinjin e saj. Shumë vende evropiane që atëherë kanë rritur shpenzimet ushtarake për të forcuar sigurinë afatgjatë në rajon. Broshura të shpërndara në miliona familje në vendet nordike përfshijnë udhëzime se si të përgatiten për efektet e konflikteve ushtarake, ndërprerjet e komunikimit dhe ndërprerjet e energjisë elektrike, si edhe ngjarjet ekstreme të motit. Nga grumbullimi i ujit në shishe dhe produkteve sanitare, deri tek rritja e produkteve ushqimore në shtëpi, autoritetet qeveritare ofrojnë këshilla se si banorët mund të përballojnë situatën në rast lufte. Broshurat përfshijnë gjithashtu këshilla për prindërit, duke i udhëzuar ata të ruajnë pelena, ilaçe dhe ushqim për fëmijë. Qeveria suedeze do të shpërndajë broshurat për pesë milionë familje gjatë një periudhe dy javore, duke nisur nga 18 nëntori. Versioni i pestë i broshurës suedeze, i cili u botua për herë të parë në Luftën e Dytë Botërore, do të vendosë "theksin tek përgatitjet për luftë". Versioni dixhital i broshurës, i lëshuar në tetor, është shkarkuar rreth 55,000 herë. Broshurat e reja përfshijnë këshilla për evakuimin, si të ndalohet gjakderdhja, trajtimin e ankthit, si t'i flitet fëmijëve për luftën dhe si të mbështen anëtarët veçanërisht të cenueshëm të popullatës. Ministria e Brendshme e Finlandës lëshoi gjithashtu udhëzime të reja për krizën, duke u dhënë lexuesve këshilla se si të përgatiten për ndërprerje të gjata të energjisë, ndërprerje të ujit, ndërprerje të telekomunikacionit, ngjarje ekstreme të motit dhe konflikte ushtarake. Më herët, udhëzimet e kohës së luftës i përditësuan edhe norvegjia dhe danimarka.