Lufta në Ukrainë dhe zgjedhjet presidenciale në SHBA dominuan një samit të NATO-s në Uashington këtë muaj, por, larg skenës publike, planifikuesit ushtarakë të aleancës janë fokusuar në vlerësimin e kostos së madhe të forcimit të mbrojtjeve të Evropës. Udhëheqësit e NATO-s ranë dakord për planet vitin e kaluar për rinovimin më të madh në tre dekada të aftësive të saj mbrojtëse, mes frikës në rritje të agresionit rus. Në prapaskenë, zyrtarët që atëherë kanë hedhur në letër kërkesat minimale të mbrojtjes për të arritur ato plane, të cilat iu dërguan qeverive kombëtare javët e fundit, sipas një planifikuesi ushtarak, i cili foli në kushte anonimiteti. Kërkesat minimale detajojnë mangësitë në ushtritë e NATO-s në fushat kryesore, duke ofruar një tregues të përafërt se sa miliarda euro mund të nevojiten për ti korrigjuar ato, thanë planifikuesit ushtarakë. NATO synon t'i shndërrojë këto kërkesa në objektiva obliguese për qeveritë individuale, me qëllim që të sigurohet mbrojtja e plotë e Evropës deri në vjeshtën e vitit 2025, kur edhe do të mbahet një takim i rregullt i ministrave të mbrojtjes. Reuters foli me 12 zyrtarë ushtarakë dhe civilë në Evropë për planet e klasifikuara, të cilët përmendën gjashtë fusha që aleanca me 32 vende anëtare i ka identifikuar si më të ngutshmet për t'u trajtuar. Këto përfshijnë mungesa në mbrojtjen ajrore dhe raketa me rreze të gjatë veprimi, numrin e trupave, municionet, problemet logjistike dhe mungesën e komunikimeve të sigurta dixhitale në fushën e betejës.