Mësuesit, drejtuesit e trenave, farmacistët dhe stafi i spitaleve hynë në grevë ndërsa adoleshentët bllokuan shkollat e mesme në Francë të enjten, në kuadërë të një dite protestash kundër shkurtimeve të afërta të buxhetit. Sindikatat po bëjnë thirrje që planet fiskale të qeverisë së mëparshme të anulohen. Ata kërkojnë edhe më shumë shpenzime për shërbimet publike, taksa më të larta për të pasurit dhe për anulimin e një ndryshimi jopopullor që i bën njerëzit të punojnë më gjatë për të marrë pensionin. Në Paris, shumë linja metroje ishin planifikuar të ndaleshin për pjesën më të madhe të ditës, përveç orës së pikut të mëngjesit dhe pasdites. Nxënësit u mblodhën duke bllokuar hyrjet në disa shkolla. "Bllokoni shkollën tuaj kundër masave shtrënguese", shkruhej në një pankartë të ngritur nga një nxënës para një shkolle të mesme në Paris në një tubim ku përfshiheshin mësues dhe përfaqësues të punëtorëve. "Punëtorët janë aq të përçmuar nga kjo qeveri dhe nga Presidenti Emmanuel Macron saqë nuk mund të vazhdojnë më kështu", tha një shofer autobusi. "Jam këtu për të mbrojtur shërbimet publike", tha edhe një mësues 33-vjeçar, "në veçanti, për të kërkuar që paratë publike të kthehen në shërbime publike... në vend që t'u drejtohen kompanive të mëdha ose t’u dhurohen ultra të pasurve". Makron dhe kryeministri i tij i sapoemëruar Sebastien Lecornu janë nën presion nga parlamenti për shkurtimet e mundshme të buxhetit dhe nga investitorët e shqetësuar për deficitin në ekonominë e dytë më të madhe të eurozonës. Një burim nga Ministria e Brendshme tha se deri në 800,000 njerëz pritej të merrnin pjesë në greva dhe protesta. Deficiti buxhetor i Francës vitin e kaluar ishte afër dyfishit të tavanit prej 3% të BE-së, por sado që dëshiron ta ulë atë, Lecornu, i varur nga partitë e tjera për të çuar përpara legjislacionin, do të përballet me një betejë të ashpër për të siguruar mbështetjen e nevojshme parlamentare për një buxhet për vitin 2026. Paraardhësi i Lecornu-së, Francois Bayrou, u rrëzua nga parlamenti për shkak të planit të tij për një shtrëngim buxhetor prej 44 miliardë eurosh. Kryeministri i ri nuk ka thënë ende se çfarë do të bëjë me planet e Bayrou-së, por ai ka sinjalizuar një gatishmëri për kompromis.