Qeveria greke ka ndërmarrë një hap të rëndësishëm për mbështetjen e familjeve në nevojë, duke bërë ulje të mëdha çmimesh në të paktën 1.660 produkte. Qeveria dhe bizneset vendase kanë nënshkruar një marrëveshje për të ulur çmimet, me synimin për të ndihmuar familjet që përballen me kosto të larta të jetesës. Kjo listë përfshin artikuj ushqimorë si mielli, qumështi, mishi, si dhe produkte të tjera si detergjentë, shampo, pelena për fëmijë dhe mjetet shkollore. Ulja mesatare e çmimeve pritet të jetë rreth 7%, në varësi të artikullit dhe do të vazhdojë për një periudhë prej dy deri në katër muaj. Disa produkte, veçanërisht mjetet shkollore, do të kenë një ulje më të madhe dhe tek disa të tjera mund të shkojë deri në 35%. Produktet që përfshihen në këtë program do të shënohen me një shenjë të veçantë në supermarket, dhe konsumatorët mund t'i identifikojnë ato edhe në një platformë të dedikuar online.