Një aksident tragjik ka ndodhur gjatë orëve të mbrëmjes të së enjtes në vendin e quajtur Perama në ishullin e Mitilinit. Sipas policisë lokale, gjatë aksidentit kanë humbur jetën dy persona, njëri prej të cilëve shtetas shqiptar 21 vjeç. Policia thotë se viktimat po udhëtonin me motor në aksin Papadhou-Perama, një prej arterieve kryesore të ishullit të Mitilinit, në kohën që u përplasën me njëri tjetrin. Prej përplasjes mbeti i vdekur në vend 21 vjeçari shqiptar Salea Hamzai, ndërsa pak më vonë humbi jetën në spital edhe 19 vjeçari grek. Ngjarja ka tronditur komunitetin shqiptar në ishullin e Mitilinit. Sipas Policisë dy të rinjtë po udhëtonin me motor, po duket se shpejtësia e lëvizjes, errësira, por edhe shkelja e rregullave të qarkullimit rrugor ka bërë që drejtuesi i motorit të humbë drejtimin dhe të përplaset fatalisht, duke shkaktuar vdekjen e tyre.