Ndryshe nga deputeti Dashnor Sula, i cili pasi nuk arriti të ishte pjesë e listës së mbyllur të Partisë Demokratike zgjodhi të largohej nga kjo forcë për të garuar nën siglën e koalicionit Nisma Shqipëria Bëhet, deputetet Jorida Tabaku e Dhurata Çupi kanë një qëndrim ndryshe. Tabaku, e cila rezultoi edhe gruaja më e fituar në primaret e Berishës, u shpreh para hyrjes në Kuvend se asnjë post a detyrë nuk e ka patur të dhuruar, por të fituar, e kështu beson se do të jetë sërish në Kuvend pas 11 majit. Në Partinë Demokratike asgjë nuk më është falur. Çdo betejë e kam fituar me punë dhe përkushtim, dhe ashtu do të ndodhë edhe tani! Do të jem në Parlamentin e ri për të përfaqësuar jo vetëm demokratët që më votuan, por edhe ata që ende nuk e shohin veten të përfaqësuar. Për një ekonomi më të mirë, për shtresën e mesme, për familjet shqiptare, për integrimin Europian dhe për luftën ndaj korrupsionit! Një qëndrim të njëjtë mbajti edhe deputetja Çupi.