Dy të rinj, 23 dhe 19 vjeç kanë rënë në prangat e policisë pak minuta pas një grabitjeje me dhunë në një karburant në hyrje të Librazhdit. Nga hetimet është zbuluar se dy të rinjtë të cilët qarkullonin me një automjet me targa të mbuluara kanë arritur të vjedhin xhiron ditore të punonjësit dhe më pas janë larguar. Mësohet se autorët kanë qenë të maskuar dhe kanë arritur të kryejnë vjedhjen nën kërcënimin e një sendi të ngjashëm me armë zjarri. Falë reagimit të shpejtë të policisë, ata u identifikuan dhe u kapën vetëm pak minuta pas ngjarjes. Pasi janë larguar nga vendngjarja, për të fshehur autorësinë, kanë hedhur në shkurret e fshatit Mirakë sendin e përdorur për kanosje, maskat dhe veshjet e tyre. Gjatë operacionit, shërbimet e Policisë kanë bërë të mundur gjetjen e këtyre sendeve, të cilat u sekuestruan në cilësinë e provës materiale, së bashku me lekët e vjedhura, celularët dhe automjetin e shtetasve të arrestuar. Materialet iu referuan Prokurorisë së Elbasanit, ndërsa autorët do të përballen me akuzat për “Vjedhje me armë, kryer në bashkëpunim” dhe “Mbajtje pa leje të armëve dhe municionit”.