Ka shkuar në 7 numri i personave të arrestuar për sulmin me armë ndaj hotel ‘Voloreka’ në Tushemisht të Pogradecit. Gjatë një operacioni që është zhvilluar të enjten në Tiranë, kanë rënë në prangat e policisë edhe organizatori i dytë I ngjarjes Meardi Berberi, si dhe ekzekutori Anterio Kaloshi dhe bashkëpunëtori i tyre Ervin Kalaja i cili i ka strehuar. Policia është në kërkim dhe të një personi të tetë për ngjarjen, i identifikuar me inicialet B.S. Gjatë operacionit të koduar Driloni, Shërbimet e Forcave Operacionale kanë bërë kapjen në flagrancë të tyre në zonën e Linzës, Tiranë, në garazhin e Ervin Kalasë. Gjatë kontrollit të ushtruar në këtë ambient, janë gjetur e sekuestruan në cilësinë e provës materiale 4 armë zjarri tip pistoletë, 1 armë gjuetie, 1 thikë dhe sasi municioni luftarak, të cilat i posedonin pa leje, dokumente të dyshuara si të falsifikuara, sasi monetare në lekë dhe euro. Gjithashtu janë sekuestruar pjesë të ndryshme të armëve të zjarrit që dyshohet se janë përdorur në ngjarje të tjera kriminale, të cilat do dërgohen për ekzaminim ne laboratorin shkencor.