Ndalim qarkullimi që ishte imponuar në Holandë, muajin e kaluar, me qëllim frenimin e përhapjes së koronavirusit, duhet të revokohet menjëherë. Kjo është deklaruar nga gjykata e distriktit në Hagë, e cila ka pohuar se koalicioni qeverisës nuk ka të drejtë të përdorë fuqitë e situatës së emergjencës për të aplikuar masën kufizuese. Në një deklaratë të shkruar, gjykata e ka përcaktuar ndalimin e qarkullimit, një shkelje të rëndë të së drejtës së lirisë së lëvizjes dhe privatësisë, që kufizon në mënyrë indirekte edhe të drejtat e lirisë së mbledhjes dhe manifestimit. Gjykata ka dalë në përfundimin se ndalim qarkullimi është imponuar duke u mbështetur tek një ligj emergjence në një kohë kur nuk ka një emergjencë akute. Qeveria kishte zgjatur ndalim qarkullimin nga ora 21 që dëri në 4.30, deri më 2 mars, duke u mbështetur në një ligj që lejon evitimin e provesit normal legjislativ në rast emergjence. Sidoqoftë, për gjykatën, ndalimi i qarkullimit nuk kërkonte përdorimin e procesit të përshpejtuar. Qeveria holandeze ka apeluar vendimin dhe i ka kërkuar gjykatës të pezullojë vendimin deri në seancën e apelit. Kryeministri holandez, Mark Rutte ndërkohë, ftoi holandezët të vazhdojnë të respektojnë ndalimin e qarkullimit. Pamjet: AFP