Revista “Islands” i ka dedikuar një artikull promovues qytetit të Gjirokastrës, duke e cilësuar si një nga destinacionet më tërheqëse të Shqipërisë jugore. Në artikull thuhet se “qyteti joshës prej guri” është i njohur për kështjellën e tij historike, rrugicat me kalldrëm dhe kuzhinën tradicionale të shijshme. I vendosur në një kodër, Gjirokastra është pjesë e trashëgimisë botërore të UNESCO-s dhe ofron një udhëtim në kohë përmes shtëpive karakteristike. Një nga pikat më të rëndësishme të qytetit, sipas revistës, është Kalaja e Gjirokastrës, një fortesë madhështore që daton që nga shekulli VI. E njohur për historinë e saj të pasur, ajo sot shërben si muze dhe ofron pamje spektakolare mbi qytetin dhe natyrën përreth. Artikulli vlerëson gjithashtu Pazarin e Vjetër, i cili ruan ende gjallërinë përmes dyqaneve artizanale, punimeve me dorë dhe produkteve tipike shqiptare. Ndër atraksionet natyrore që rekomandohet është Ura e Ali Pashës, e cila tërheq vizitorë të pasionuar pas historisë dhe eksplorimeve në natyrë. Gjirokastra, thuhet në artikull, është e lehtësisht e arritshme nga Tirana përmes një udhëtimi prej rreth 3.5 orësh me makinë, ndërsa një tjetër alternativë është përmes tragetit nga ishulli i Korfuzit e më pas me rrugë tokësore.