Presidenti i Polonisë Andrzej Duda dhe Presidenti i Gjermanisë Frank-Ëalter Steinmeier, morën pjesë të enjten në një ceremoni pranë monumentit dedikuar Kryengritjes së Varshavës, një ditë para 80-vjetorit të saj. Një ditë më parë, presidenti gjerman u takua me veteranët e kryengritjes së Varshavës dhe kërkoi "faljen" e tyre. Kryengritja e armatosur kundër forcave pushtuese gjermane naziste shpërtheu më 1 gusht 1944 dhe zgjati dy muaj para se të shtypej. Gati 200,000 njerëz, kryesisht civilë, humbën jetën gjatë 63 ditëve të betejës dhe kryeqyteti polak u shndërrua në një grumbull rrënojash. "Nuk ka fjalë që bëjnë drejtësinë për këtë tmerr... Unë kërkoj, këtu, tani, falje," tha Steinmeier duke iu drejtuar veteranëve të mbledhur në sheshin e Varshavës që pa një nga betejat e para të kryengritjes. Revolta kundër pushtuesve nazistë, konsiderohet gjerësisht si më tragjikja në historinë e përgjakshme dhe të trazuar të Polonisë. Sipas Muzeut Rising të Varshavës, i hapur për të përkujtuar kryengritjen, vetëm rreth 400 ish-luftëtarë janë ende gjallë. Qeveria aktuale pro BE-së e Polonisë, e udhëhequr nga kryeministri Donald Tusk, i ka kërkuar Gjermanisë të sigurojë kompensim financiar për humbjet që vendi ka pësuar nga trupat naziste gjatë Luftës së Dytë Botërore. Ajo ndoqi një qëndrim të ngjashëm të partisë populiste Ligj dhe Drejtësi, që humbi pushtetin në tetor. Por Steinmaier, gjatë kësaj vizite, nuk dha ndonjë sinjal për mundësinë e kompensimit.