Kryeministri britanik, Boris Johnson ka emëruar Sir Stuart Peach, si të dërguarin e posaçëm të Mbretërisë së Bashkuar për Ballkanin Perëndimor. Sir Stuart Peach do të marrë këtë post pas dorëheqjes si Kryetar i Komitetit Ushtarak të NATO-s në fillim të këtij viti, një post që ai e mbajti që nga viti 2018. Më parë ai ka shërbyer dhe si Shefi i Shtabit të Mbrojtjes të Mbretërisë së Bashkuar. Si i dërguar i posaçëm i Kryeministrit britanik, Sir Stuart do të punojë me liderët e Ballkanit Perëndimor, dhe aleatët SHBA dhe Evropë për të mbështetur dhe forcuar stabilitetin rajonal. Emërimi i Sir Stuart Peach, si i dërguari i Qeverisë Britanike për Ballkanin Perëndimor nuk është komentuar zyrtarisht nga Bashkimi Europian. Gjithsesi, kjo lëvizje dëshmon faktin se Londra, edhe pas Brexit-it, kërkon të ketë rol të rëndësishëm në rajon.