Gjashtë adoleshentë kanë dalë para gjyqit në Paris të hënën për rolin e tyre në vrasjen e mësuesit Samuel Paty. Ky është gjyqi i parë, nga dy gjithsej, për rastin që tronditi Francën. Të dyshuarit arritën në gjykatën për të mitur. Gjyqi ndaj tyre do të jetë i mbyllur për publikun dhe pritet të zgjasë deri më 8 dhjetor. Mësuesi 47-vjeçar i historisë dhe gjeografisë u ther dhe më pas iu pre koka, afër shkollës së mesme në Konflans-Seint-Honorine, në periferi të Parisit. Sulmuesi i tij, refugjati çeçen, Abdoullakh Anzorov, 18 vjeç, u qëllua për vdekje nga policia në vendin e ngjarjes. I riu vrau Patyn pas mesazheve të shpërndara në rrjetet sociale që thoshin se mësuesi kishte shfaqur gjatë orëve të mësimit karikatura të profetit Muhamed të revistës satirike, Charlie Hebdo. Paty kishte përdorur këtë revistë si pjesë të orës së tij të etikës për të diskutuar për ligjet për lirinë e shprehjes në Francë, vend ku blasfemia është e ligjshme dhe karikaturat bëjnë humor me figurat fetare shihen nëpër gazeta e revista prej shumë kohësh. Vrasja e tij ndodhi disa javë pasi Charlie Hebdo ripublikoi karikaturat për profetin Muhamed. Fillimisht këto karikatura ishin publikuar më 2015, që nxiti një sulm të islamistëve në zyrat e kësaj reviste, të cilët vranë 12 persona. Javën e kaluar, mësuesi Dominique Bernard u vra në Aras në veri të Francës nga radikal i ri islamik. Vrasësi i dyshuar i Bernardit është Mohammed Moguchkov, vjen nga rajoni i Kaukazit Verior të banuar me shumicë myslimane.