Ministrja e Punëve të Jashtme dhe Diasporës e Kosovës, Donika Gërvalla, ka dënuar fjalimin e presidentit të Serbisë, Aleksandar Vuçiç, të mbajtur para Asamblesë së Përgjithshme të OKB-së, dhe tha se ky fjalim ishte një "tentativë për shtrembërimin e historisë” lidhur me Kosovën. Gërvalla hodhi poshtë pretendimet e Vuçiqit se “zanafillën e agresionit rus në Ukrainë e sheh te pavarësimi i Kosovës, dhe paturpshëm pretendon se më 2008 Serbisë i ka ndodhur kjo që i ndodh Ukrainës sot”. “Deklarata e shpalljes së pavarësia e Kosovës nuk është shkelje e ligjit ndërkombëtar, e as rezolutave dhe dokumenteve të tjera të rëndësishme të OKB-së, rrjedhimisht as Kartës së OKB-së. Këtë e ka gjykuar dhe vendosur trupi më i lartë juridik i OKB-së, Gjykata Ndërkombëtare e Drejtësisë, në opinionin e saj të nxjerrë më 22 korrik 2010, me kërkesë të vet Serbisë”, tha Gërvalla përmes një deklarate. Vuçiç, para Kombeve të Bashkuara akuzoi shtetet Perëndimore se kanë “shkelur brutalisht” Kartën e OKB-së dhe Rezolutën 12 44, duke e njohur pavarësinë e Kosovës dhe duke “i mohuar të gjitha parimet që sot po i mbrojnë”.