Kryeministri Edi Rama përmes një videoje në Facebook ka treguar procesin e rindërtimit të qytetzës së re Thumanë e cila po rindërtohet, pasi pësoi dëme të mëdha pas tërmetit shkatërrues të 26 nëntorit. Kreu i vendit tha se brenda 4 muajve Thumana do të shndërrohet në një qytezë të re, me 278 apartamente në 14 pallate, 155 banesa individuale, infrastrukturë moderne, shëtitore, terrene sportive, hapësira të gjelbërta, si dhe shkollën e kopshtin “Ramazan Jangozi”, por edhe qendër komunitare në shërbim të banorëve. Rama shtoi se punimet kanë ecur me ritme rekord dhe se në tetor do të fillojë akomodimi i familjeve në banesat e reja. Kryeministri tha se në fund të vitit përfundon i gjithë siti, përfshirë objektet publike për të cilat po punohet paralelisht nga Bashkia, e ku do të përqendrohen Njësia Administrative, Qendra Shëndetësore dhe një pjesë e mirë e shërbimeve publike për qytetarët.