Mediat serbe kanë zbuluar lidhjet e një bosi të një grupi kriminal me ndikim në Beograd, me presidentin Aleksandar Vuçic. Krik, një media serbe, ka publikuar dëshmi të Veljko Belivuk, kreu i një grupi kriminal të rrezikshëm, i cili akuzohet për disa vrasje. Në seancën dëgjimore në zyrën e prokurorit, ai foli për marrëdhënien e tij të pretenduar me Presidentin serb Aleksandar Vuçiç dhe njerëz të tjerë nga Partia Progresiste Serbe. Vuçiç dhe bashkëpunëtorët e tij i kanë kërkuar Belivuk disa shërbime, mes të cilëve mbajtja nën kontroll e tifozëve në tribunën e Partizanit që ata të mos brohorisnin kundër presidentit, si dhe për të frikësuar ata që organizonin protesta kundër qeverisë etj. Veljko Belivuk, konsiderohet shefi i një grupi kriminal të dyshuar për disa vrasje të dhunshme, edhe pse ai vetë i ka mohuar akuzat në seancën para prokurorit, dy javë më parë. Në fillim të gushtit, zyra e prokurorit për krimin e organizuar pritet të ngrejë padinë ndaj Belivuk ose sic njihet ndryshe Velja Nevolja, lider i grupit të huliganëve Principi, që funksiononte edhe brenda klanit malazez Kavac. Klani belivuk konsiderohet si një nga më të ashprit në rajon. Ndërkohë që grupi kriminal dihet se ka patur kontakte të forta në vend për vite, fillimisht me policinë e më pas edhe me politikën, me emrin e presidentit Vucic që ka dalë në lojë më së fundi. “Unë vendosa të them gjithcka për marrëdhënien time me presidentin serb, Aleksandar Vucic, ministrin e rendit Aleksandar vulin, vëllain e vucicit, miqtë, kumbarët e politikanët e tjerë që kanë kërkuar shërbimet tona dhe që tani pretendojnë se nuk na njohin dhe duan të lajnë duart me ne”, i ka thënë Belivuk prokurorit. Ai madje ka kërcënuar se do të japë edhe më shumë detaje në të ardhmen nëse disa persona të caktuar nuk do të ulen me këmbë në tokë. Edhe pse është e vështirë të vlerësohet se cfarë është e vërtetë dhe cfarë jo në dëshminë e Belivuk, disa detaje që ai ka dhënë para prokurorit, koincidojnë me atë cka më herët ishte përfolur se grupi i tij kishte rol në shtypjen e protestave, por kishte edhe lidhje me njerëz me pushtet.