Policia rrugore ka vijuar kontrollet në disa segmente rrugore, kryesisht në ato që janë identifikuar si “njolla të kuqe” të qarkullimit me shpejtësi. Gjatë 12 orëve të fundit është monitoruar me Radar në rrugën Sauk-Teg, për evidentimin dhe ndëshkimin e shkelsve të Kodit Rrugor, me qëllim parandalimin e aksidenteve rrugore. Ndërkohë vijon monitorimi dhe me në të gjitha rrugët e Tiranës për të parandaluar drejtimin e mjetit nën ndikimin e alkoolit apo më keq akoma në gjendje të dehur. 20 Leje Drejtimi të pezulluara për disa orë kontroll gjatë mbrëmjes së të shtunës dhe deri në orën 01.00 të mëngjesit të kësaj të diele, nga këto 10 për shpejtësi tej normave të lejuara dhe 10 për drejtim mjeti nën efektin e alkoolit apo në gjendje të dehur. 4 drejtues mjetesh të arrestuar, nga të cilët 3 për drejtim mjeti në gjendje të dehur dhe 1 që drejtonte mjetin pa Leje Drejtimi. Edhe pse kontrollet janë shtuar së tepërmi në këto akse me rrisk, ende ka shumë drejtues mjetesh që abuzojnë me shpejtësinë dhe me alkoolin në timon. Për disa orë monitorim me Radar janë evidentuar 10 drejtues mjetesh që qarkullonin me shpejtësi që varionin nga 138 km/h deri në 168 km/h. Kontrollet kanë vijuar dhe vijojnë në rrugët e kryeqytetit duke përdorur dragerat dhe si rezultat i kontrolleve deri në këto momente janë evidentuar 7 drejtues mjetesh duke drejtuar mjetet nën ndikimin e alkoolit.