Gjyqtari Luan Daci është dënuar me 6 muaj burg nga Gjykata kundër Korrupsionit dhe Krimit të Organizuar, për falsifikim dokumentacioni. Struktura e Posaçme e Anti-Korrupsion, SPAK ka kërkuar 1 vit burg për Dacin, I cili është anëtar I Komisionit të Posaçëm të Apelit të Vettingut, por gjykata vendosi për 6 muaj dhe ky dënim konvertohet në 12 muaj shërbim prove. Sipas akuzës, gjyqtari Luan Daci ka falsifikuar dokumentacionin në momentin që aplikoi për t'u bërë pjesë e trupës së KPA-së. Në dokumentacionin e paraqitur në atë kohë nga gjyqtari i KPA ai fshehu faktin se kur ishte gjyqtar në gjykatën e Tiranës në 1997, KLD-ja me propozim të ministrit të Drejtësisë e shkarkoi nga detyra për shkelje të ligjit dhe paaftësi. Gjyqtari Daci u pezullua në 20 maj të këtij viti, kur u mor në hetim nga SPAK, por Apeli e rrëzoi vendimin duke e rikthyer në detyrën atë vetëm 2 javë më pas. Tani pas dënimit nga shkalla e parë, ai automatikisht humbet edhe postin që mban në KPA. Gjyqtari Luan Daci bëhet kështu zyrtari i parë I lartë që dënohet nga Gjykata kundër Korrupsionit dhe Krimit të Organizuar.