Prokuroria e Tiranës, ka marrë të pandehur pas mbylljes së hetimeve dy mjekët gjinokologë të Maternitetit ‘Koço Gliozheni’ Aida Hoxha dhe Ervis Vata, për veprën penale ‘Neglizhencë në trajtimin mjekësor’. Sipas porkurorisë, ka qenë një shtetase e cila humbi foshnjën e saj të porsalindur gjatë procesit të lindjes, e cila ka kallëzuar rastin. Organi I akuzës sqaron, se pas akteve të ekspertimit, rezultoi se vdekja e foshnjës erdhi për shkak të dëmtimeve të rënda gjatë lindjes, të shkaktuara nga përdorimi i forcepsit, një mjet që përdoret zakonisht në lindjet e vështira, kur lindja natyrale nuk përparon ose kur është tepër vonë për ndërhyrje kirurgjikale. Sipas ekspertizës mjeko-ligjore, dëmtimet që çuan në shok traumatik hemorragjik të foshnjës, nuk janë pasojë e një komplikacioni të paparashikueshëm, por rrjedhojë direkte e mungesës së ndërhyrjes në kohë, që do të kishte shmangur përdorimin e forcepsit nëse lindja do të ishte bërë me seksio cezarian, siç ishte planifikuar paraprakisht.