Mjeku infeksionit Tritan Kalo i cili ka qenë në vijën e parë të COVID që nga fillimi i pandemisë, ka lajmëruar se është larguar nga Komiteti Teknik i Ekspertëve, i krijuar më 31 janar 2020, pas shpalljes nga OBSH-ja emergjencë botërore për koronavirusin. "4 Marsi shënon edhe fundin e bashkëpunimit tim zyrtar me këtë grup të emërtuar: Komiteti i përhershëm për Infeksionin e përhapur nga Coronavirusi i ri", shkruan Kalo. Ndërsa jep këtë lajm përmes një postimi në rrjete sociale, Kalo shkruan se edhe kësaj here sipas tij politika bëri të mundur përçarjen e mjekëve. “Nëse veproni nga lajtmotivi ndërshekullor, se “Nuk ka armik më të egër për shqiptarin se vetë shqiptari”, ju mëshiroj….Më 31 Janar 2020 është krijuar nga MShMS një Komitet prej 11 ekspertësh për mirëmenaxhimin e epidemisë së “Sars-Cov2/Covid-19, në të cilin kam dhënë edhe unë kontributin tim modest si mjek, sepse jam i vetmi që nuk jam drejtues ose funksionar nga të gjithë anëtarët e tij…. Si kurdoherë edhe kësaj here “pordhpolitika” e bëri të mundur t’i përçajë mjekët në qëndrimet dhe në kontributin e tyre, për t’u përballur me këtë “flamë mbarëbotërore”, thotë mjeku. Sipas Kalos ekzistojnë 3 komitete, ai i qeverisë, i presidentit dhe i opozitës së gjerë. Në një kohë kur duhet bashkëpunim, sipas tij mjekët janë të ndarë në 3 llogore. Mesazhin e tij ai e përmbyll duke thënë se nëse dikush e ka dashur vendin e tij në Komitet, tashmë e ka të lirë. "Ju jam shumë mirënjohës për mirëbesimin që treguat ndaj eksperiencës dhe përkushtimit tim….Nese dikush nga kritizerët e gjithologët e ka dëshiruar këtë vend ai/ajo e ka atë tashmë të lirë….unë këtu jam dhe kurrë nuk do heq dorë nga kontributi, për tu shërbyer atyre që besojnë në Punën, Përkushtimin dhe Profesionalizmin tim, por edhe për të dhënë ndihmesën time në mbarëvajtjen e punëve për t’u përballur me këtë Pandemi, nëse një gjë e tillë do vijojë ende të më kërkohet…", shton ai.