Presidenti rus Vladimir Putin ka dërguar ministrin e tij të jashtëm dhe një këshilltar të lartë të Kremlinit për të takuar zyrtarët amerikanë në Arabinë Saudite të martën për të diskutuar mbi rivendosjen e marrëdhënieve dhe bisedimet e mundshme për t'i dhënë fund luftës në Ukrainë, tha Kremlini të hënën. Presidenti i SHBA Donald Trump tha pas një telefonate me Putinin të mërkurën se ata do të fillonin bisedimet që synojnë t'i japin fund luftës në Ukrainë menjëherë dhe se kishin diskutuar gjithashtu edhe për Lindjen e Mesme, energjinë, dollarin amerikan dhe Inteligjencën Artificiale. Sekretari amerikan i Shtetit, Marco Rubio, ka shkuar në Arabinë Saudite për të takuar zyrtarët rusë së bashku me Mike Ëaltz, këshilltarin e Trumpit për sigurinë kombëtare dhe Steve Ëitkoff, të dërguarin e Shtëpisë së Bardhë për Lindjen e Mesme. Zëdhënësi i Kremlinit Dmitry Peskov tha se Sergei Lavrov, ministër i Jashtëm i Putinit që nga viti 2004, dhe Yuri Ushakov, një këshilltar për politikën e jashtme të Kremlinit, po fluturonin për në Riad me kërkesë të Putinit. “Ata pritet të mbajnë një takim me homologët e tyre amerikanë të martën, i cili do të fokusohet kryesisht në rivendosjen e të gjithë kompleksit të marrëdhënieve ruso-amerikane”, tha Peskov. "Do të bisedohet gjithashtu për përgatitjen e negociatave të mundshme për zgjidhjen e cështjes së Ukrainës dhe organizimit të një takimi midis dy presidentëve." Peskov nuk pranoi të komentonte mbi një raport të Reuters se Kirill Dmitriev, shefi i fondit të pasurisë sovrane të Rusisë, do të takohej gjithashtu me delegacionin amerikan. Ai gjithashtu nuk pranoi të komentonte kur u pyet nëse Putin dhe Trump do të takohen ballë për ballë në Arabinë Saudite më vonë këtë muaj. Para nisjes për në arabinë saudite, në një konferencë për shtyp me homologun e tij serb, lavrov tha se nuk e kupton pse Evropa do që të ftohet në bisedimet e mundshme për paqen në Ukrainë nëse politikanët evropianë duan që lufta të vazhdojë. Lavrov tha se Evropa ka patur tashmë disa shanse për t'u përfshirë në një zgjidhje për Ukrainën dhe se ai nuk e dinte se si do të kontribuonin shtetet evropiane nëse do të ftoheshin në tryezën e bisedimeve duke pasur parasysh qëndrimin e tyre për luftën. Ka pikëpamje të ndryshme për Ukrainën midis politikanëve evropianë, por shumica thonë se duan atë që ata e quajnë "një paqe të drejtë dhe të qëndrueshme".