Më shumë se dy milionë emigrantë të paligjshëm janë larguar nga Shtetet e Bashkuara gjatë vitit të parë të mandatit të dytë të Presidentit Donald Trump dhe deri më tani janë punësuar më shumë se 10,000 agjentë federalë të imigracionit, tha Sekretarja e Sigurisë Kombëtare Kristi Noem. “Dy milionë njerëz janë kthyer tashmë në shtëpi, njerëz që ishin këtu ilegalisht. Do të dërgojmë më shumë në shtëpi edhe për festat.” – deklaroi ajo. Noem tha se Zyra e Imigracionit dhe Doganave ka punësuar rreth 10,000 oficerë të rinj këtë vit, mijëra të tjerë kanë aplikuar për punë. Sekretarja e sigurisë Kombëtare, deklaroi se administrata Trump synon të zgjerojë ndalimin e udhëtimit në më shumë se 30 vende pas të shtënave me armë zjarri ndaj dy anëtarëve të Gardës Kombëtare gjatë ThanksGiving. “Nuk dua të jem specifike për numrin, por është mbi 30 dhe Presidenti po vazhdon të vlerësojë vendet”, tha ajo në një intervistë për Fox Neës. Pas të shtënave në Uashington që lanë të vdekur një anëtar të Gardës dhe një tjetër të plagosur rëndë, Trump ka ndërmarrë veprime kundër një numri vendesh që ai i përshkroi si “të botës së tretë”. Deri më tani këtë vit, Shtëpia e Bardhë ka ndaluar ose kufizuar udhëtimet nga 19 vende, duke përfshirë Afganistanin, Kubën, Republikën e Kongos, Haitin, Iranin, Libinë, Sudanin, Turkmenistanin, Venezuelën dhe Jemenin.